حكم استخدام فيس بوك وبرامج الشات أثناء العمل

حكم استخدام فيس بوك وبرامج الشات أثناء العمل




بسم الله الرحمن الرحيم، أهلاً وسهلاً بكم في هذا الموقع اللطيف اللي قدرت أن أتواصل معكم من خلاله "بص وطل".

ما زالت الأسئلة من بعض الشباب ترد لي، وفيها سؤال عن حكم استعمال الفيس بوك وبرامج الشات "الثرثرة والرغي" أثناء العمل؟

النبي صلى الله عليه وسلم يقول: "إن الله يحب من أحدكم إذا عمل عملاً أن يتقنه"، ولذلك العمل هو عبارة عن عقد ما بين طرفين؛ صاحب العمل سواء كانت الحكومة، سواء كان صاحب الشركة، سواء كان أي جهة. والعامل في مقابل أجر؛ فهو اشترى وقته، إذا كان العامل بيشتغل 8 ساعات فهو بياخد أجر الثماني ساعات، فلازم يشتغل الثماني ساعات بما يُرضي الله وعلى الأوضاع العادية، ولما أضيع منهم ساعة واتنين وتلاتة خاصة إن الإنترنت والكمبيوتر ممكن يعمل إدمان وممكن يسلب إرادة الإنسان وممكن يخليه مش حاسس بالوقت وممكن لما يتداخل الإنسان مع النت فإنه ينسحب الوقت ويمضي دون أن يشعر به.

ولذلك يبقى هنا نوع من أنواع أنه أخذ حق غيره، أو أنه استعمل دقائق وساعات هو واخد ثمنها، ولذلك فإن هذا الأسلوب وهذا السلوك حرام وخطأ ويؤثر في أمانة الإنسان ويؤثر في مصداقيته وفي شفافيته.

ويقول: هل ساعات العمل بالكامل ملك لصاحب العمل، حتى لو تم خلالها إتمام المهام المطلوبة بالكامل؟

طبعاً الأعمال بتختلف، فيه حاجة اسمها تحقيق النتيجة وفيه حاجة اسمها بذل المجهود، فيه أنواع من العمل لازم تبذل المجهود ما ينفعش تقول: "أنا حققت النتيجة وخلاص"، لكن فيه نوع تاني من العمل بيقول: "أنا عايزك تحقق لي النتيجة"، ومن ضمنها أنا عاوز أرسم لوحة مثلا، فأنا رسمتها.. خلاص، أنا عاوز أصمم برنامج، فأنا صممته.. مافيش حاجة عندي تاني، وهذا العمل من أجل تحقيق النتيجة، أنا عملته في ربع ساعة وزميلي عمله في ساعتين دي كفاءة، ولكن لو كان العمل من النوع بتاع بذل المجهود يبقى نعم كل الوقت ملك صاحب العمل، وكله ماينفعش إن إحنا نتطاول على صاحب العمل فيه، بذل المجهود أو تحقيق النتيجة لازم تخلي مخك فارق ما بين الأحوال دي، وما دمت بتدقق في الأسئلة يبقى لازم تعوّد مخك إنه يفرّق ويخلي ده ملف وده ملف، ألطف حاجة في المخ العلمي إنه يكون عقلية فارقة تفرق ما بين الصور، يشوف إن الصورة دي غير الصورة دي، بذل المجهود غير تحقيق النتيجة.

الطبيب من ضمن بذل المجهود يعني ما يقدرش الطبيب إنه يتعهد بالشفاء، لكن هو بيقوم بالعملية 100%، وبيقوم بالنصيحة ويكتب الروشتة بقدر المستطاع، لكن ما يقدرش يحقق الشفاء؛ لأن الشفاء من عند ربنا، فشوف الفرق ما بين الفنان أو البروجرامر اللي بيحط البرنامج ويخلصه أو اللوحة ويبنيها وما بين الطبيب اللي بيبذل المجهود حتى لو لم تتحقق النتيجة، فلازم علينا يكون فيه عقلية فارقة علشان نعرف الفرق بين الاتنين.

وبيقول سؤال تاني إن فيه ناس كثيرة من الرجال ترغب فى الزواج للمرة الثانية، ويشجع بعض الدعاة على ذلك بحجة زيادة العنوسة؟

أنا عندي هنا برضه ملفين؛ الملف الأول إن ربنا أباح التعدد، ولكن الملف الثاني إن سيدنا رسول الله صلى الله عليه وسلم لما كان عنده أسرة لم يعدد. ولذلك لم يتزوج على السيدة خديجة، إنما حكاية الدعاة اللي بيقولوا إن لازم كل الناس تتزوج مرة ثانية عشان تقضي على العنوسة، ده كلام مش مظبوط، إنما فيه حاجة مباحة في الشريعة لها شروط ولها أوضاعها، وممكن نتكلم فى حلقة ثانية بتوسع عنها، وفيه مثال نبوي لازم إن أنا أتخذه وهو أنه عندما رزق الرسول صلى الله عليه وسلم بأسرة فإنه لم يتزوج على السيدة خديجة ونلتقى قريبا إن شاء الله.. السلام عليكم.